مخزون المحتوي.. سر الاستمرار
كتير من مقدمي المحتوي خصوصا في البديات بيقابل مشكلة صغيرة ولكنها مهمة … المشكلة دي هو ان الحماس بيزيد وبيقول أو ممكن نقول انه مش بيفضل بنفس الشغف في الكتابة أو تسجيل الفديوهات نفسه .. وممكن يستغرب من الناس اللي بتنزل بوست كل يوم أو فديو كل اسبوع بنفس الحماس والنشاط!
خلينا نتفق ان ده طبيعي جدا ومش بس في تقديم المحتوي لكن في كل حاجه في الحياة تقريبا …
لكن مع الوقت الموضوع ده بيقل جدا وبتلاقي نفسك خلاص اتبرمج علي الاستمرار وبمجهود أقل كمان
وعلشان تقدر تواصل وفعلا تستمر خصوصا في البدايات .. في سر صغير لكن هيعجبك أوي
وهو انك تستفيد فترة الحماس وتكتب بوستات كتيرة وتنزل بوست كل فترة أو انك تسجل فديوهات كتيرة وتجدول نزولهم كل اسبوع فديو
وهو ده بقي اللي ممكن نسميه مخزون المحتوي
وكأن المحتوي ده انتاج وانت انتجت منه كميه كبيرة وبتخزنها في مخزن وبتطلع منه كل ما تحتاج أو علي فترات محدده انت بتخطط لها
والطريقة دي أنا مجربها بنفسي خصوصا في الفديوهات اللي بنزلها علي قناة اليوتيوب… فبعمل ايه؟
باحد يوم في الشهر واسحب فيه علي الاقل ٤ فديوهات وبعد كده لما بيكون عندي وقت بعمل المونتاج واجدول نزولهم علي اليوتيوب
وبالتالي بيبقي نزول المحتوي منتظم نسبيا غير لما اشيل هم التسجيل والمونتاج في كل اسبوع
حاجه كمان بقيت اخلي مش كل المونتاج عليا يعني مثلا حلقين اعملهم مونتاج وحلقتين اخلي حد فري لانسر بعملهم مونتاج وهكذا
المهم انك تخلي مجهود الكتابه او التصوير ده مرة واحده وبعد كده تطلع من اللي انت كتبته أو صورته ..تطلع من المخزون ده وتنشر بحيث تحتفظ علي ان التواجد بتاعك مستمر